عازة قومي كفاك نومك

[becareman]

كتب وقطع قلبي
Don Ahmad
وهو طالب جامعي كتب الى العازة


عازة ... ... قومي اسمعيني .. ما تعبتي يا عازة .. ما فترتي من الرقدة الطويلة دي .. كم سنة و انتي مهودة .. كم سنة و انتي نايمة .. ما مليتي ؟؟ ما طهقتي ..؟؟ ما فاض بيك ؟؟ يا عازة انحنا فترنا ... و الصبر فتر مننا .. دايرنك تقومي لينا .. تسمعينا ..
يا عازة انحنا بنتسرق .. عمرنا و احلامنا يبموتوا قدامنا .. و نحن ما قادرين نقول شي .. مع انو الجوانا كان طلعنا يهد جبال .. كان مرقت الآاااااااااااه دي تهب نيران .. يا عازة ما تسكتي ... السكات بيودر الحق
انتي ما كنتي نايمة .. لكن ما قدر ده .. كنتي نايمة مرتاحة .. و انحنا عايشين .. حسي نومتك دي ماااااااااااهي هينة .. خدروك بي شنو يا عازة .. خلوك لا قادرة تقومي .. لا قادرة تشوفي .. ولا حتى قادرة تسمعي ..
خدروك .. و قسموك .. قسموك حتت يا عازة .. غربك بيحتضر .. و شرقك شمسو غابت .. و جنوبك راح مع الراح .. و شمالك الله بستر عليهو ..و في القسمة دي ما ادونا شي منك .. أولادك هجروك يا عازة .. و اتشتتوا في واطات الله دي .. يا عازة أولادك فاتو هناااااااااااك ... محل ما اتخيلنا في يوم نمشي ... بقوا الصهاينة ارحم ليهم منك .. بقى عمنا سام احن علينا منك .. و يا عازة و انتي نايمة .. طلعوا من بطنك مولود جديد .. قالوا دهب اسود .. حضرنا سمايتو يا عازة .. و فرحنا ليك .. لكن شالوهو ربوهو و كبروهو بعيد عننا .. مع انو ولدنا .. لكنو بقى بعيد عننا .. اليشيلو يا عازة .. بس يقوموك لينا .. دايرين نفرح بيك .. طولنا ما فرحنا يا عازة ...و بكضبوا علينا يا عازة .. بقولوا لي الناس انحنا طيبين .. بس طيبين بي وين ..؟؟ هم مرتاحين أي .. بس انحنا تعبااااااااااااانين ..يا عازة بتك وزارة الصحة بتقول الصحة تمام .. و لفت فيك لقت الرعاية مية مية .. تكون غلطت فيك وما عرفتك .. تكون لفت في حتة تانية ؟؟. تكون شافت مستشفيات غير حقتنا .. تكون شافت سراير غير سرايرنا .. تكون ما اتعرفت على النقالات الخاتينها جوة المستشفيات .. تكون ما شافت صحبتي الصغيرة الماتت ..لمن جاتها حمى .. وابوا يعالجوها عشان ما عندها حق الكشف .. تكون ما لاحظت العيان وهو داخل و شايل في يدو حقنو و دريباتو .. وطوبتو البيسند بيها السرير .. ما اتعترت في الراجل العجوز المرمي في الواطة عشان ما لاقي عنبر يلمو .. يا عازة انحنا بنموت و زول سائل فينا مافي ...نكون ما بني آدمين؟؟!! و والينا يا عازة .. والينا عارفنا جعانين ... و ضايقين المرة .. الا هو ما شغال بينا ... شغال بي مشروعك الحضاري .. يا عازة دايرين يحضروك .. و يمدنوك .. هم ما عارفين انتي كنتي شنو ؟؟ ما عارفين انك من زمااااااان متحضرة و رافعة راسك فوق .. وهم الطاطوا راسك لي ناس ما تسوى ..
و بقيتي في زمنهم ارهابية يا عازة .. الناس بقت تخاف منك .. انتي الطول عمرك مسالمة .. ختوك في صفوف الأراهاببين .. وبقى أي زول يحظر فيك و يعاقبك .. بقيتي ملطشة .. والأجانب دخلوك يا عازة .. عشان قال خايفين علينا .. وكل العملوا يا عازة انهم حلفوا طلاق انو ما يخش عليك زول غريب .. و يتفرج فيك .. و دخلوا يا عازة .... هي حليفة طلاق بتقيف في وشهم .. وحاااااااااااااتك يا غالية ما بتقيف ....
حتى ولدك بقى ما ياهو .. غيروهو يا عازة .. ولدك الطول عمرو مشهود ليهو بي الأمانة والعزة ... بقى وصمة عار في بلاد كتيرة ... شبابك يا عازة بقى دايش ... ما عارف يقبل وين .. بقى حاسي انك خليتيهو و رميتيهو .. و بقى ما فارق معاهو أي شي ...و بناتك يا عازة مرقن الشارع بيعن في الشاي .. و يبيعن في روحهن للبيدفع أكتر.... ..دايرات يعيشن يا عازة..

يا عازة الجونا ديل جونا من وين ؟؟ أولادك يا عازة ؟؟ جبتيهم انتي ؟؟ .. ولا جابم زول غيرك ...؟؟ دايرين شنو هم .. حتت كراسي .. تطير الكراسي يا عازة .. و يطير أي شي قدامك .. انحنا ما دارين لينا كراسي .. دارينك انتي .. دارين نشرب من نيلك .. نمشي في ترابك .. و نشم هواكي .. و ناكل من خيرك .. حتى خيرك حرمونا منو ..

يا عازة قومي ..اسمعي لي حاجة آمنة .. غلبها الصبر ..و ماهي قاااااااااادرة.. مشتهية ايام زمان.. و سنين زمان.. شوفي عم عبد الرحيم ...المهيتو اوف .. و حالو حرن.. و بالو اشتغل .. و هوووووووود يا عازة .. و اتلافا القطر.. و ما قام تاني ..الا انتي لازم
تقومي ........يا عازة قوووووووووووومي كفاك نومك ....... باقي ليكم بتقوم قبل القيامة تقوم ؟؟


اهداء لكل السياسين في بلدي ... الفاتو والحاليين والجايين عشان يشوفوا كيف الناس نتشوف عازة بعيون تختلف عن عيونهم تماما المغشاة

[einas]

[youtube][/youtube]

[Hani]

[youtube][/youtube]